Хөдөө аж ахуйн салбарт ажиллаж буй иргэдийн амьжиргааг дэмжих, ажилтай орлоготой болгох, ХАА-н үйлдвэрлэлийг нэмэгдүүлэх замаар ажлын байр бий болгох, малын чанарыг сайжруулах, ашиг шимийг нэмэгдүүлэх, цөм сүрэг бүрдүүлэх, эрчимжсэн аж ахуйн техник технологийн шинэчлэлийг үе шаттай хэрэгжүүлж, бүтээмж үр ашгийг нэмэгдүүлэх зорилготой “Шинэ хөдөө” төсөл 2024 оноос эхлэн Хэнтий аймагт хэрэгжиж эхлэнэ. Үүнтэй холбоотойгоор Чингис хотноо “Шинэ хөдөө-2024″ төслийн хэлэлцүүлэг зохион байгуулагдлаа.
Тус хэлэлцүүлэгт ХХААХҮ-ийн дэд сайд М.Ганхүлэг, УИХ-ын гишүүн Ц.Идэрбат, аймгийн Засаг дарга Ц.Чогсомжав болон сумын төвийн баг тус бүрээс сонгогдсон малчдын төлөөлөл, Багийн засаг дарга, ИНХ-ын дарга Сумын Засаг дарга, ИТХ-ын дарга нар оролцсон юм.
Хэлэлцүүлгийн үеэр аймгийн Засаг дарга Ц.Чогсомжав “Хэнтий аймгийн хөдөө аж ахуйн салбарын өнөөгийн байдал”-ын талаар илтгэл тавьж, мал аж ахуйн чиглэлээр, бэлчээр болон усан хангамжийг сайжруулах чиглэлээр, газар тариалангийн чиглэлээр 3 зорилтын хүрээнд 6 арга хэмжээг хэрэгжүүлэх санал дэвшүүллээ.
Тодруулбал, малын үүлдэр угсааг сайжруулах, ашиг шимийг нэмэгдүүлэх, баталгаажсан үүлдэр, омгийн хээлтүүлэгч малын цөм сүрэг бий болгох, бэлчээрийг нөхөн сэргээх, хортон мэрэгчтэй тэмцэх, бэлчээрт худаг уст цэг гаргах, хөв цөөрөм байгуулах, Малын тэжээлийн ургамал, ногоон тэжээл тариалах, Малчдын бүлэг, хоршоог дундын техниктэй болгох гэсэн 6 асуудлыг суурь судалгаатайгаар танилцуулсан юм.
Тэрбээр “Шинэ хөдөө-2024” төслийг аймагтаа үр дүнтэй зохион байгуулахын тулд төсөлд санал авах тухай албан бичгийг 18 сум, 5 тосгонд хүргүүлснээс 15 сумаас давхардсан тоогоор 130 санал ирүүлснийг ийнхүү нэгтгэн, аймаг орон нутгийн бодлоготой уялдуулан танилцуулж байгаагаа дурьдсан юм.
