Олон улсын хэмжээнд сурталчлагдан жил бүр тогтмол зохион байгуулдаг “Талын түмэн адуу”, “Тогорууны баяр”, “Галшар адууны баяр”, “Талын гөрөөчин тайга нохой”, “Ёохор наадам”, “Чингис фестиваль” зэрэг зургаан эвент арга хэмжээг сүүлийн гурван жилд дотоодын 248.7 мянга, гадаадын 4387 жуулчин үзэж сонирхжээ.
Жуулчдын тоо 2020 оны тоо мэдээтэй харьцуулахад 36.8 хувиар өсөж, аялал жуулчлалын салбарын орлого 1 дахин нэмэгдэж 14 тэрбум төгрөгт хүрсэн байна.
Тэгвэл Хэнтий аймаг түүхэн аялал жуулчлалыг хөгжүүлэх хүрээнд зургаан цогцолборыг ашиглалтад оруулж байгаа. Үүнээс өнгөрөгч 2021 оноос хойш “Тэнгэрийн андгай”, Биндэр сумын “Их хуралдай” цогцолборыг ашиглалтад хүлээн авсан.
Харин “Мянганы суут хүн Чингис хаан” цогцолбор “Шихихутаг-Их засаг”, “Монголын далд уурхайн музей, сургалт, судалгаа, аялал жуулчлалын төв”, “Монголын нууц товчоо” гэсэн дөрвөн цогцолборын ажлын явц дунджаар 93.6 хувьтай хийгдэж байна.
