ХХААХҮ-ийн сайд Х.Болорчулуунаар ахлуулсан ажлын хэсэг өнөөдөр Батноров суманд ажиллаж, онцгой комиссын өргөтгөсөн хуралдааныг зохион байгууллаа. Хуралдаанд улсын болон аймгаг, сумын онцгой комиссын төлөөллүүд оролцлоо. Мөн хөрш зэргэлдээ Норовлин, Баян-Адарга, Бэрх, Баян-Овоо сумдын удирдлагууд оролцож сумынхаа өвөлжилтийн нөхцөл байдал, тулгамдаж буй асуудлаа танилцуулсан юм.
Батноров сумын тухайд 2023 оны 11 дүгээр сараас хойш их бага 30 удаагийн давтамжтайгаар цас орж, цагаан зудын байдалтай байна. Үүнтэй холбоотойгоор өвөлжилтийн бэлэн байдлыг хангаж сумын аюулгүйн нөөцөд өвс, тэжээл 45тн, малчдын түвшинд байгалийн хадлан 7400 тн, ногоон тэжээл 5тн, үйлдвэрийн тэжээл 4тн, гар тэжээл 3тн бэлтгэсэн байна.
Мөн энэ хугацаанд малчдадаа 320 шуурхай хивэг, хорголжин хивэг 53 шуудай, хөнгөлөлттэй үнээр улсын онцгой комиссоос 1000 боодол өвс, сумын аюулгүйн нөөцийн 1000 боодол өвсийг тус бүр багуудад хуваарилан олгоод байгаа гэдгийг тус сумын Засаг дарга Б.Жавхланбаяр мэдээллээ.
Батноров сум өвөлжилт хүндэрсэнтэй холбоотойгоор малчдадаа туслах хандивын аян, зам даваа хаагдсан 7 багийн 134 өрхийг холбосон 546 км-т зам гаргах, хүнс тэжээл өвсний дутагдалтай байгаа айл өрхүүдийн судалгааг авах, Засаг дарга болон хурлын даргаар ахлуулсан ажлын хэсэг 2 удаа отор болон суурин өвөлжиж байгаа 51 өрхөөр эрүүл мэнд, хүнсний тусламж үзүүлэх зэрэг ажлуудыг зохион байгуулжээ. Газар тариалангийн компани тракторыг дайчлан зам нээх ажлыг эхлүүлсэн бөгөөд зам гаргах, малчдад аймгаас өвс тэжээл татах ажилд 3.500.000 мянган төгрөгийг зарцуулаад байна.
Тус сумын хувьд өвс тэжээлийн дутагдалтай 508 өрх, хүнс тэжээлийн дутагдалтай 81 өрх, зам даваа хаагдсан 130 өрхүүдэд тусламж үзүүлэхээс гадна туулах чадвартай, олон хүний багтаамжтай шийдэж өгөхийг ажлын хэсэгт санал дэвшүүллээ.
Тэгвэл ХХААХҮЯ-ны ажилчид малчдадаа туслахаар нэг өдрийн цалингаа хандивлаж 150.000.000 төгрөгийг босгожээ. Үүний 50 сая төгрөгийг Хэнтий аймгийн Батноров, Норовлин, Баян-Адарга, Бэрх, Баян-Овоо сумуудад тус бүр 10 сая төгрөгийг хандивлахаар боллоо. Харин улсын онцгой комиссоос 4.5 тн хивэг, аймгийн онцгой комиссоос 20 хүнсний багцыг тус тус олголоо.
Дашрамд сонордуулахад Батноров сумын 36 малчин өрхийн 25874 мал найман суманд оторлож байна.
