Эргэх холбоо хөтөлбөрийн хүрээнд 2023 оны намрын чуулганы завсарлагаанаар УИХ-ын 18 дугаар тойргийн гишүүд өнгөрөгч долоо хоногт Хэнтий аймагтаа ажилласан. Ингэхдээ УИХ-ын гишүүн, Монгол Улсын Сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ, Монгол улсын Ерөнхий сайдын Бүс нутаг хариуцсан зөвлөх У.Отгонбаяр, аймгийн ХБТХОХ-ийн дарга Э.Мөнх-Эрдэнэ, БШУГ-ын дарга С.Мөнхцэцэг нар Тэмүүжин цогцолбор сургуулийн “100 хүүхдийн дотуур байр”-ыг нээсэн юм.
Тэмүүжин цогцолбор сургууль нь 2023-2024 оны хичээлийн жилд 123 багш ажилчид, 2100 сурагчидтайгаар үйл ажиллагаагаа явуулж байна. Улсын төсвийн 2.8 тэрбум төгрөгийн санхүүжилтээр баригдсан уг дотуур байр ашиглалтад орсноор 80 гаруй хүүхэд тохилог сайхан орчинд байрлаж, суралцах нөхцөл боломж нь бүрдэж байгаа юм.
