Батширээт сумын ерөнхий боловсролын сургууль 350 гаруй сурагчидтай бөгөөд үүний 100 гаруй нь малчдын хүүхдүүд суралцдаг. Малчдын хүүхдүүдийн хувьд дийлэнхдээ дотуур байранд амьдрах хүсэлтэй боловч багтаамжаас шалтгаалан зуун хувь хамрагдаж чаддаггүй байна. Учир нь 50 хүүхдийн ортой дотуур байранд 80 орчим хүүхэд амьдардаг байжээ. Тиймээс дотуур байранд амьдрах хүсэлтэй малчдын хүүхдүүдийг бүрэн хамруулах үүднээс Батширээт суманд улсын төсвийн 3.2 тэрбум төгрөгөөр 100 ортой сурагчдын дотуур байрыг шинээр барьж, ашиглалтад орууллаа.
Тус дотуур байрын барилгыг Хэнтий аймгийн ЗДТГ-ын захиалгаар “Винтер Гарден ХХК” хийж гүйцэтгэжээ. Барилгын гадна талыг 100 хувь металл фасадаар хийснээрээ онцлог юм. Мөн сургуулийн хамт олны зүгээс сумын малчид, иргэдийнхээ дунд чалленж үүсгэн, хандив цуглуулснаар дотоод тохижилтын ажлыг хийхээр болжээ.
Дашрамд сонордуулахад Батширээт суманд сүүлийн 3 жилийн хугацаанд 15.8 тэрбум төгрөгийн бүтээн байгуулалтууд хийгджээ. Тухайлбал 2024 оны эхэнд дээрх дотуур байраас гадна Барх гол дээр 121 метрийн гүүр, 10 ортой эмнэлгийн барилгын өргөтгөлүүд гэх мэт бүтээн байгуулалтуудын ажлууд дуусаж, зэрэг нээлтээ хийсэн юм.
