Монгол улсын Засгийн газар, БНСУ-ын Засгийн газрын хооронд байгуулсан хөнгөлөлттэй зээлийн гэрээний хүрээнд арван аймагт төвийн дулааны станц баригдаж буй.
Уг төслийн нэг хэсэг нь Хэнтий аймагт хэрэгжиж байгаа бөгөөд автомат удирдлагын систем бүхий хүрээлэн буй орчинд бохирдол багатай 30 гкал\ц хүчин чадалтай дулааны станц баригдаж байгаа билээ.
Барилгын ажлыг 2022 онд эхлүүлсэн бөгөөд барилгын ажил 40 гаруй хувьтай үргэлжилж байна. Гүйцэтгэгчээр БНСУ-ын “Бьюксан инженеринг” компани, туслан гүйцэтгэгчээр “Хасу мегаватт” компани ажиллаж байгаа юм.
Барилгын ажлыг 2024 оны зургаадугаар сард хүлээлгэн өгөхөөр гэрээнд тусгажээ. Аймгийн төвүүд иж бүрэн төвлөрсөн дулаан хангамжийн системтэй болсноор иргэдийн амьдрал, нийгэм эдийн засагт дараах эерэг нөлөөг үзүүлнэ. Үүнд:
- Хэрэглэгчид жилийн турш найдвартай халаалт, хэрэгцээний халуун усаар хангагдана
- Дутуу шатсан нүүрс, дэгдэмхий үнс хийсэж орчныг бохирдуулахгүй, аймгийн төвийн агаарын чанар сайжирч, амьсгалын замын өвчлөл буурна
- Ажиллагсдын хөдөлмөрийн аюулгүй байдал, эрүүл ахуйн нөхцөлийг хангасан 100 гаруй ажлын байр шинээр бий болно.
- Жижиг, дунд үйлдвэрлэл хөгжих боломж бүрдэж, бүс нутгийн хөгжил түргэснэ
- Иргэдийн ажиллаж, амьдрах таатай нөхцөл бүрдэж, орон нутгийн хөгжил дээшлэх зэрэг ач холбогдолтой юм.
