Өчигдөр буюу 12 дугаар сарын 14-ний өдөр Хэнтий аймгийн онцгой комисс хуралдлаа. Тодруулбал цаг агаар, өвөлжилтийн нөхцөл байдал болон шатахууны нөөц хангалтын талаар хэлэлцсэн юм. Мөн ОХУ-аас импортоор авч буй цахилгаан эрчим хүчний хэмжээ буурч улмаар нэгдсэн сүлжээ чадлын дутагдалт орж байгаа талаарх асуудлыг ч хөндлөө.
Хуралдаанд сумдын онцгой комиссын дарга буюу засаг дарга нар цахимаар оролцож сумдын нөхцөл байдалтай холбоотой шийдвэрлүүлэх асуудлын талаар аймгийн онцгой комисст санал хүргүүллээ. Сумдын хувьд их хэмжээний цасны улмаас өвөлжилт хүндэрсэн, зудын нөхцөл байдалд үүссэн, шатахуун, өвс тэжээлийн нөөц хомс, машин техникийн чадал, хүрэлцээ муу байна гэх мэт асуудлууд тулгамдаж байна гэдгийг хэлж байсан юм.
Тиймээс аймгийн Засаг дарга Ц.Чогсомжав сумдын Засаг дарга нарт халаалтын уурын зуухны нөөц генераторын хэвийн ажиллагааг өөрийн биеэр шалгаж, бэлтгэл бэлэн байдлыг хангах, цаг агаарын хүндрэлтэй нөхцөл байдлын үед мэргэжлийн байгууллагаас гаргасан заавар зөвлөмж, анхааруулга мэдээллийг малчин иргэдэд нэн яаралтай хүргэж, аюул эрсдэлээс урьдчилан сэргийлэх арга хэмжээг авч хэрэгжүүлэхийг даалгалаа.
Мөн өвөлжилтийн нөхцөл байдал хүндрээгүй аймагт оторлох нөхцөл боломжийг судлахыг ХХААГ-ын дарга Ж.Энх-Амгаланд, аймгийн Засаг даргын 2023 оны "Хөдөө аж ахуйн салбарын өвөлжилтийн бэлтгэл хангах тухай" 07 дугаар албан даалгаврын хэрэгжилтийг хангуулах чиглэлээр сумын аюулгүйн нөөцөд өвс 60 тонн, тэжээл 40 тонныг бэлтгэхийг мөн бүх шатны Засаг дарга нарт үүрэг болгосон юм.
