Байгаль, цаг агаарын хэт хүйтрэлт, томуу, томуу төст өвчний тохиолдлын тоо нэмэгдэж байгаатай холбогдуулан БШУЯ-аас бага ангийн хичээл, сургалтыг 2023 оны 12 дугаар сарын 18-ны өдрөөс 12 дугаар сарын 29-ний өдрийг хүртэл цахим хэлбэрт шилжүүлсэн.
Энэхүү шийдвэр нь багш, эцэг эх, сурагчдад гэнэтийн шийдвэр болж, иргэд тал талын байр суурийг цахим орчинд илэрхийлсээр байгаа юм.
Тэгвэл Хэрлэн сумын ЕБС-иудын бага ангийн багш нараас 2 өдрийн цахим хичээлийн нөхцөл байдлын талаар тодруулахад тус шийдвэрийг гэнэтийн байхаас гадна дөнгөж үсгээ үзэж эхэлж буй 1 дүгээр ангийнханд хэцүү зүйлүүд гарч байна гэдгийг хэлсэн юм. Мөн цахим хичээлийн хамрагдалт муу буюу нэг ангийн ирц 50 хүрэхтэй үгүй л байна гэлээ.
Сурагчдын хувьд гар утас, интернэтгүй орчинд амьдардаг, аав ээж нь ажилдаа явахаар утасгүй, нэг гэрт бага ангийн 2-аас дээш хүүхэд суралцдаг тул төхөөрөмжийн хүрэлцээ хомс гэх мэт асуудлаас болж цахим хичээлдээ хамрагдаж чаддаггүй байна.
Жишээлбэл 37 суралцагчтай ангийн 16 хүүхэд нь цахим хичээлдээ хамрагдаагүй бөгөөд эцэг эх нь ухаалаг гар утасгүй, датагүй гэх шалтгаанаар байжээ. Ингээд харахаар ухаалаг гар утас байтугай дата авч чадахгүй хэмжээний боломж муутай айлуудын хүүхдүүдэд цахим хичээл хүндээр тусч, хичээлийн хоцрогдолтой болохоос гадна цаашлаад боловсролын зөрүү яригдаж байгаа юм.
