Ардчилсан намын хувьд өнгөрсөн хугацаанд дотооддоо хагаралтай, гадагшаа нэр хүндгүй, гишүүд дэмжигчдээ эргэлзээтэй байдалд оруулсан, улс төрийн намын рейтинг нь унасан он жилүүд байлаа.
Гэвч өнөөдөр урьдын адил нэг баг болж, нягт ажиллаж ялалтад хүрч чадна гэж жирийн гишүүд нь горьдлого тээн харж байгаа ч намынх нь дотоод фракц, бүлэглэлүүдийн тэмцэл улам ширүүсэж Баярцогт, Женко нарт хуваагдан өөр хоорондоо толхилцож байх үеэр нь намын дарга Гантөмөрт нь АТГ -с эрүүгийн хэрэг үүсгэн шалгаж эхэлжээ.
Ардчилсан нам нь ардчилсан үнэт зүйлтэй ч түүнийхээ төлөө бодлого шийдвэрээ гаргаж явах биш зөвхөн фракцуудын эрх ашиг, амбицыг хангахын төлөө байгаа тул намын зарим залуусын намдаа үл итгэх шалтгаан нь болж байгаа бололтой.
Учир нь Ардчилсан намын залуусын төлөөллүүд намаасаа гарч ХҮН намыг сонгох жим татагджээ. Тэдгээрийн нэг нь Хэнтий аймгийн Ардчилсан намын ҮБХ-ны гишүүн, АНХорооны дэд дарга байсан Д.Баярбилэг юм.Хэнтий аймгийнхан ирэх онд болох улсын их хурлын сонгуульд ардчилсан намаас Д.Баярбилэгийг өрсөлдөх таамгийг дэвшүүлж байсан ч тэрээр намын гишүүнээс татгалзах өргөдлөө хэдийн зурсан байна.
Түүний хувьд яагаад ХҮН намыг сонгов? Бусдын бодолд өөр, өөр нам харагдах боловч үзэл санаа, үндсэн зорилго, суурь зарчмууд нь адил учир сонгосон байх. Юутай ч ирэх сонгуульд нам гүмхэн орших ХҮН нам хүчирхэгжсэн улс төрийн хүчин болон гарч ирэхээр чармайж буй бололтой.
