Өнгөрсөн жилээс эхлэн аймгийн засаг дарга Ц.Чогсомжавын санаачилгаар төсөл, сонгон шалгаруулалтыг ил тод явуулдаг болсон. Үүний хүрээнд Хөдөлмөр халамж үйлчилгээний газраас “Иргэн, аж ахуй эрхлэгчид олгох санхүүгийн дэмжлэг”-ийн арга хэмжээний төсөл сонгон шалгаруулалтыг шударга, олон нийтэд нээлттэй явуулах зорилгоор “Амжилтын гүүр” нэвтрүүлгийг хийж байна.
Тус төслийн нэгдүгээр шатанд 29 иргэн, аж ахуй эрхлэгчид төслөө ирүүлснээс хоёрдугаар шатанд 25 иргэн шалгарч “Амжилтын гүүр” нэвтрүүлэгт оролцож байгаа юм. Оролцогчдын хувьд оёдол, цагаан идээ, үсчин гоо сайхан, дугуй засвар, төмөр хийц болон хоол үйлдвэрлэлийн чиглэлээр төслүүд бичжээ.
Энэ удаагийн төслийн сонгон шалгаруулалтыг ХХҮГ-ын захиргаа хяналтын хэлтсийн даргын албан үүргийг түр орлон гүйцэтгэгч О.Баттогтох, хөдөлмөр эрхлэлтийн асуудал хариуцсан мэргэжилтэн Б.Энхцолмон, аймгийн ЗДТГ-ын нийгмийн бодлогын хэлтсийн мэргэжилтэн Ж.Цэнджав, мэргэшсэн мэргэжил сургалтын төвийн менежер С.Нямцэрэн, ажил олгогчийн эздийн холбооны тэргүүн Д.Энхзаяа нар шүүж, 10.000.000 төгрөгийн тэтгэлэг авах 21 иргэн, аж ахуй эрхлэгчдийг сонгох юм. Шалгарсан иргэдийн хувьд уг тэтгэлэгт мөнгөө 3 жилийн дотор хүүгүй буцааж төлөх нөхцөлтэй байна.
