Өнөөдөр \2023.10.21\ Хэнтий аймгийн Чингис хотноо "Эрдэнэт сүргийн эзэд" малчдын чуулга уулзалт зохион байгуулагдаж байна. Тус чуулганд УИХ-ын дарга Г.Занданшатар, УИХ-ын гишүүн Б.Бат-Эрдэнэ, Ц.Идэрбат, ХХААХҮЯ-ны дэд сайд М.Ганхүлэг, аймгийн Засаг дарга Ц.Чогсомжав, УИХ-ын гишүүн асан, дуучин МУГЖ С.Жавхлан болон 18 сумын 600 орчим малчид, засаг дарга нарын хамт оролцож байгаа юм.
Тэгвэл чуулганы эхэнд аймгийн засаг дарга Ц.Чогсомжав орон нутгийн бодлого шийдвэрийн талаар танилцуулсан бол УИХ-ын дарга Г.Занданшатар "Шинэ сэргэлтийн бодлого-Хөдөөгийн сэргэлт"-ийн талаар мэдээлэл өглөө. Ингэхдээ малчдын тэтгэврийн даатгалын шимтгэлийн 50 хувийг 5 жил төлөх шийдвэр, төрөөс малчид руу чиглэсэн бодлого шийдвэр, улсын төсвийн талаар танилцуулга хийсэн юм.
Мөн энэ үеэр Хүнс, Хөдөө аж ахуйн сайдын зөвлөлийн 2023.10.16-ны өдрийн хуралдаанаар Хэнтий аймгийн Дадал суманд үржүүлж буй Мах-сүүний хосолмол ашиг шимтэй дадлын ухаа үхрийг “ДАДАЛЫН УХАА” үүлдрээр батлуулаад байгааг энэ чуулганы үеэр онцоллоо.
Дашрамд дуулгахад Хэнтий аймаг 5,1 сая малтай. 12463 мал бүхий иргэд, 9097 малчин өрхтэй. Нэг малчинд 479 мал ноогдож байгаа улсын дунджаас илүү байгаа юм.
