Хэнтий аймгийн удирдлагууд Бүгд Найрамдах Польш улсаас Монгол улсад суугаа Элчин сайдын яамны хэргийг түр хамаарагч ноён Кшиштоф Швидеректэй албан уулзалт хийлээ.
Уулзалтад аймгийн иргэдийн Төлөөлөгчдийн Хурлын дарга Б.Цогт-Орших, аймгийн Засаг даргын орлогч Б.Өнөрцолмон, аймгийн Засаг даргын Тамгын газрын дарга А.Жаргалсайхан болон холбогдох албаныхан оролцож, аймгийн нийгэм, эдийн засгийн хөгжлийн талаар ерөнхий танилцуулга хийж, цаашдын хамтын ажиллагааны боломжийн талаар санал солилцов.
Уулзалтын үеэр Монгол, Польш хоёр улсын 1950 онд дипломат харилцаа тогтоосноос хойшхи найрсаг харилцаа, хамтын ажиллагааны ололт амжилтыг онцоллоо.
Боловсролын салбарт Польшийн их, дээд сургууль, мэргэжлийн боловсролын байгууллагуудтай хамтын ажиллагаа тогтоох, сурагч солилцооны хөтөлбөр хэрэгжүүлэх, Хэнтий аймгийн сурагчдыг Польшийн Засгийн газрын тэтгэлэгт хөтөлбөрт хамруулах боломжийг нэмэгдүүлэх талаар ярилцлаа.
Хөдөө аж ахуйн салбарт Польш Улсын туршлага, технологийг судлан нэвтрүүлэх, харилцан туршлага солилцох, хамтын ажиллагааны боломжийг эрэлхийлэх асуудлыг тавилаа.
Байгаль орчны салбарт бэлчээрийн доройтол, цөлжилт, хөрсний элэгдэлтэй тэмцэх, ойжуулалт, усны нөөцийг зохистой ашиглах, хог хаягдлын менежментийг сайжруулах чиглэлээр Польшийн холбогдох байгууллага, мэргэжилтнүүдтэй хамтран ажиллах боломжийн талаар санал солилцлоо.
Хэнтий аймаг нь боловсрол, хөдөө аж ахуй, байгаль орчин зэрэг салбарт олон улсын хамтын ажиллагааг хөгжүүлэх, сайн туршлагыг нэвтрүүлэх, орон нутгийн хөгжлийг дэмжихэд чиглэсэн хамтын ажиллагааг өргөжүүлэхийг зорьж байна.
Энэхүү уулзалт нь Хэнтий аймгийн гадаад харилцааг бэхжүүлэх, боловсрол, эдийн засаг, байгаль орчны салбарт хамтын ажиллагааны шинэ боломжуудыг нээхэд чиглэсэн чухал алхам боллоо.
ХЭНТИЙ АЙМГИЙН ИРГЭДИЙН ТӨЛӨӨЛӨГЧДИЙН ХУРЛЫН АЖЛЫН АЛБА
