Монгол Улсад цэргийн дээд цол болох Генерал цол олгож эхэлсний 81 жилийн ойн хүрээнд “Монгол генералын өдөр”-ийг тохиолдуулан Хэнтий аймгийн түүх, соёлын үнэт өвийг хадгалан хамгаалагч Аймгийн музейн дэргэд “Генералын танхим” байгуулагдаж, өнөөдөр албан ёсоор нээлтээ хийлээ.
Нээлтийн үйл ажиллагаанд Хан Хэнтий нутгаас төрөн гарсан генерал цолтнууд аймгийн Засаг даргын урилгаар ирж оролцлоо. Энэхүү танхим нь эх оронч үзэл, үнэт зүйл, бахархал болсон эрхэм генералуудын түүхэн замнал, амжилт гавьяаг таниулан сурталчлах, шинэ үеийн залуус, иргэд олон нийтийн эх оронч сэтгэлгээг төлөвшүүлэх, түүхэн үнэт өвийг хойч үедээ өвлүүлэн үлдээх зорилготой юм. Танхимд Хэнтий нутгаас төрөн гарсан эрхэм генералуудын амьдрал, үйл хэргийг харуулсан үзмэр, гэрэл зураг, баримт материалууд дэлгэгдсэн байна.
Аймгийн Засаг дарга Д.Аюурбунь хэлэхдээ:
“Батлан хамгаалах бодлого, эх оронч хүмүүжил, эх орноороо бахархах үзлийг түгээн дэлгэрүүлэх ажлыг онцгойлон анхаарч, энэ хүрээнд ‘’Генералын танхим’’-ыг байгуулан иргэд, хүүхэд, залуучуудад зориулсан таниулах, бахархуулах орчныг бүрдүүлснээр ёс зүйтэй, эх оронч иргэн болгон төлөвшүүлэх чухал суурь болно” хэмээв.
Нээлтийн арга хэмжээнд оролцсон эрхэм генералууд энэхүү танхимыг байгуулсан Хэнтий аймгийн удирдлагууд, түүхч, судлаачид, музейн хамт олон болон нийт ард иргэдэд чин сэтгэлийн талархал илэрхийлж, “Эх орноо хайрлаж, хамгаалж явах үзэл санаа энэхүү танхимаар дамжин залуу үеийнхэнд улам гүн бат суух болтугай” хэмээн онцолж, талархал илэрхийлэв.
Эх оронч бахархал үеийн үед мандуулж, генералуудын алдар гавьяа мөнхөд дурсагдах болтугай.
