Буриад түмний соёлын их наадам “Алтаргана" нь 2 жилд нэг удаа зохион байгуулагддаг. Анх 1994 онд Хэнтий аймгийн Дадал суманд Буриад дууны уралдаан нэртэйгээр анх зохиогдож байсан тус наадам өдгөө олон улсыг хамарсан буриадын ардын урлаг, уламжлалт зан заншилын баяр болж өргөжсөн.
Алтаргана наадамд Булган, Хөвсгөл, Сэлэнгэ, Хэнтий, Дорнод, Төв аймаг, Дархан, Эрдэнэт, Улаанбаатар хотоос буриад зоны төлөөлөл оролцож, ОХУ-аас Улаан-Үд хот болон Закаменск аймаг болон БНХАУ-ын ӨМӨЗО-ны зарим аймгаас зочид ирж оролцдог.
Энэ жилийн “Алтаргана-2024” наадам анхдагчдийн өлгийн нутаг Булган аймагт зохион байгуулагдаж байна.
Наадмын сүүлд уламжлал болгож дараагийн Алтаргана наадмыг хаана зохион байгуулах талаар хуралддаг билээ. Тэгвэл тус хуралдаанд Хэнтий аймгийн Засаг дарга Ц.Чогсомжав өөрийн биеэр оролцож, “Алтаргана-2026” наадмыг аймагтаа авахаар хүсэлтээ илэрхийлжээ. Тэрбээр энэ талаараа өөрийн цахим хуудастаа:
“Дараагийн Алтаргана наадмыг хаана зохион байгуулах талаар өчигдөр буюу 7 дугаар сарын 27-нд Булган аймагт зохион байгуулагдсан хуралд оролцож өөрийн байр сууриа илэрхийлсэн. Энэ оны 3 дугаар сард Алтаргана наадмыг Хэнтий аймагт зохион байгуулах хүсэлтээ албан ёсоор хүргүүлсэн боловч хариу ирээгүй. Иймд 2026 оны "Алтаргана" наадмыг Хэнтий аймгийн Чингис хотод авах саналаа дахин илэрхийлсэн. ОХУ-ын буриадуудын хувьд энэ жил Монголд зохион байгуулсан тул 2026 онд ОХУ-ын Агын буриадад зохион байгуулах нь зөв гэдэг байр суурьтай байсан. Тиймээс 2026 онд Хэнтий аймагт зохион байгуулах боломжгүй гэсэн шийдвэр гаргаж байгаа бол 2028 онд Хэнтий аймагтаа зохион байгуулъя гэдэг саналыг хэлээд тухайн хурлын тэмдэглэлд оруулж, хариуг албан ёсоор өгөх хүсэлтээ тавьсан байгаа” хэмээн илэрхийлжээ.
