Энэ зун бороо ус элбэг байх нь. Барилгын суурийн бүтээцэд нөлөөлөхөөр удаан тогтсон болон зоорины давхарт орсон их ус барилгад нөлөөлөх байдлын талаар энгийн иргэд, ашиглагч нарт зориулан Хэнтий аймгийн ГХБХБГ-аас дараах мэдээллийг өгч байна.
Зоорины давхар, сууринд нэвчсэн ус нь барилгын бүтээцийн тогтвортой байдлыг бууруулж, барилгын даац, тогтворт нөлөөлж, хөрсний тэгш бус суулт үүсэхэд хүргэдэг. Мөн хашлага ханын материалын шинж чанар өөрчлөгдөж, барилгыг ашиглагчдын эрүүл мэндэд сөргөөр нөлөөлөх болно. Ариутгах татуургын сүлжээ, үйлдвэрийн хог хаягдал холилдсон үерийн ус нь барилгын материалын бат бөх чанарыг бууруулж, металл эд ангиудын зэврэлт хурдан явагдах нөхцөлийг бүрдүүлдэг. Хана руу шилжиж буй чийгшил нь ханын усанд уусдаг бүрэлдэхүүн хэсгүүдийг шингээж, хананы гадаргуугаас ууршиж дотор агаарын чийгшлийг нэмэгдүүлэн бичил биетэн үржих таатай нөхцөл болдог. Үүнээс гадна, суурийн доорх буурь хөрс ба улнаас дээш хөрсний шинж чанарт өөрчлөлт гарч, улмаар суулт үүсэж, бүх бүтээцийн тогтвортой хөшүүн чанар алдагдахад хүргэдэг. Иймд дараах арга хэмжээг нэн даруй авах шаардлагатай.
- Цахилгааны тэжээлээ салгаж шит самбараа хамгаалах
- Барилгын подвал, суурь, буурь хөрс үерт автах үед цаг алдалгүй усыг зөөлөн хэт хурдан биш аргаар зайлуулах Ингэхдээ барилгын байгууламж /бусад барилга ИШС-ний худаг, шугам хоолойны далан/ -ийн ойр орчмын хөрс рүү шингээхгүй байх
- Шавхаад хатаах халдваргүйжүүлэх
- Буурь хөрсний өөрчлөлтийг ажиглаж хянаж байх
- Усанд автсан суурь болон барилгын суурийн эргэн тойрон дах газрын хөрс усанд нэвчиж ан цав нуралт суулт гарсан тохиолдолд мэргэжлийн хяналтын байгууллагад хандаж үзлэг хяналт хийлгэх
- Бороо чийг хэт салхи шороогүй үед цонх гэгээвчээ нэвт онгойлгож хатаах процесст нөлөөлөх
- Дахин чийгшил үүсэхээргүй бол металл хийцийн зэвийг арилгаж хамгаалах түрхлэг хийх
Хэдийгээр барилгын бүтээцэд ус нэвчүүлэхгүй байх орчин үеийн шинэ технологиуд нэвтэрч байгаа ч одоогоор магадгүй өртөг зардлын шалтгаанаар барилгын зураг төсөлд тусгадаггүй байна. Одоо мөрдөж байгаа норм дүрэм, инженер геологийн дүгнэлтээр нарийвчилсан технологи аргачлал барилгын ажлын зурагт бүрэн тусгагдахгүй байна.
