Өндөрхаан-Чойбалсан чиглэлийн 50 км хатуу хучилттай автозамыг барьсан компанийг ЗТХ-ийн сайд С.Бямбацогт цагдаад өгчээ.
2013-2014 онд улсын төсвөөр баригдсан энэ зам өдгөө "Тавын тавь" гэж нэрлэгдэх хүртлээ эвдэрч, зорчигчдын техник хэрэгсэл, амь насанд хохиролу учруулах эрсдэл үүсгэсэн талаар С.Бямбацогт сайд дурдсан байна.
Сонирхолтой нь, тус автозамыг Улсын комисс хүлээж аваагүй. Тэгсэн ч тендерт шалгарсан компани нь санхүүжилтээ бүтэн авчээ.
Тендерийн дугаараар нь хайж үзвэл, 2013 оны хоёрдугаар сард зарлагдсан эл тендерт "Чайна гео инженеринг корпораци" компани шалгарчээ. Тендерийн дүн 12.6 тэрбум төгрөг юм байна. Тэгвэл энэ нь 2008 онд байгуулагдсан, БНХАУ-ын иргэний эзэмшдэг гадаадын хөрөнгө оруулалттай компани аж.
С.Бямбацогт сайд ЦЕГ-ын дарга Ж.Болдод хүсэлт гаргахдаа, эл асуудалд холбогдуулан мөрдөн шалгах ажиллагаа явуулж, хохирлыг нөхөн төлүүлэх хүсэлтэй буйгаа дурджээ.
