УИХ-ын гишүүн, Монгол улсын сайд, ОНБТСҮХ-ны дарга Б.Бат-Эрдэнэ, УИХ-ын гишүүн, ХХААХҮ-ийн сайд Х.Болорчулуун, Хэнтий аймгийн Засаг дарга Ц.Чогсомжав, Сангийн сайдын зөвлөх Х.Алтай нар “Шинэ хоршоо” хөтөлбөрийн мэдээлэл хүргэх зорилгоор Цэнхэрмандал сумын иргэд, хөдөлмөрчидтэй уулзалт хийлээ.
Албаныхан Бүсчилсэн хөгжлийн үр дүнд орон нутаг санхүү, эдийн засгийн эрх мэдэлтэй болж, өөрсдийн давуу ба сул талууд, хэрэгцээ шаардлага, нөөц боломжуудаа тодорхойлон, бүс нутгийнхаа онцлогт тохирсон хөгжлийн гарцаа нээх боломжтой болохыг уулзалтын эхэнд дурдав.
Цэнхэрмандал сумын иргэд, малчид хөдөлмөрөө хоршин 360 га газарт ногоон тэжээл тариалж 45 мянган боодол ургац авсан нь зудын эрсдэлийг амжилттай давах нөхцөлийг бүрдүүлсэн билээ. Уулзалтын үеэр сайд Х.Болорчулуун ногоон тэжээл тариалдаг талбайн хөрсийг хамгаалах тоног төхөөрөмж түүнчлэн трактор суманд хуваарилж, шийдвэрлэхээ илэрхийллээ. Мөн нэмж 300 га газрыг хашаалах ажилд нь дэмжлэг үзүүлэхээ мэдэгдлээ. “Шинэ Хоршоо” хөдөлгөөн эхэлснээр энэ туршлага сум бүхэнд хэрэгжих боломж бүрдэх юм.
Цэнхэрмандал сумын иргэд хоршиж ажиллах арвин туршлагатай учир “Шинэ хоршоо” хөдөлгөөнөөр дамжуулан хөнгөлөлттэй зээлд хамрагдан үйлдвэрлэлээ өргөжүүлэх, тоног төхөөрөмжөө сайжруулан жишиг хоршоотой сум болох бүрэн боломжтой юм.
