Хэнтий аймгийн Өлзийт, Бэрх, Тахилгат тосгон болон Хэрлэн, Бор-Өндөр сумуудад 500 гаруй Казак угсаатан тархан суурьшиж байна. Тэр дундаа Бэрх хотод 180 гаруй Казак иргэд ажиллаж амьдардаг.
Тэгвэл Бэрх хотын захирагчийн албанаас Казак түмнийхээ ёс заншил, өв уламжлал, үндэсний соёлын салшгүй нэг хэсэг болсон "Наурызын баяр – Нарны баяр"-ыг хүндэтгэж, жил бүр хамтдаа тэмдэглэн өнгөрүүлдэг байна.
Энэ жил тус баярыг угтаж найман настай балчраас наян настай буурал хүртэлх 90 гаруй Казак иргэдийг хамруулсан хүндэтгэлийн баярын цэнгүүнийг зохион байгуулж, өргөн дэлгэр тэмдэглэжээ. Хүндэтгэлийн цэнгүүнд Монгол улсын Ерөнхий сайдын Зүүн бүс хариуцсан зөвлөх У.Отгонбаяр, Монгол улсын УИХ-ын гишүүн Ц.Идэрбат, Хотын Захирагч Ч.Энхжавхлан нар оролцсон юм. Энэ үеэр хөдөлмөр зүтгэлээ үнэлүүлж зургаан эрхэм Монгол Улсын Ерөнхийлөгчийн Зарлигаар төрийн дээд шагнал "АЛТАНГАДАС" одон хүртсэн байна. Тодруулбал:
- Жагсамбай Агий \Уул уурхайн салбар\
- Алпий Батен \Уул уурхайн салбар\
- Кенжебек Панзира \Уул уурхайн салбар\
- Халбак Хайрат \Уул уурхайн салбар\
- Халибек Багила \Боловсролын салбар\
- Кинят Энхболд \Автотээврийн салбар\ тус тус шагнагджээ.
