2023 оны захиалагчийн хяналтын үйл ажиллагааны талаар мэдээлэл авч, чиглэл өгөх зорилгоор аймгийн Засаг дарга Ц.Чогсомжав ГХБХБГ-ын дарга болон БХБХ-ийн инженерүүд, холбогдох хэлтсийн дарга нартай хамтарсан уулзалт хийлээ.
Өнгөрсөн оны хувьд ГХБХБГ нь 129 барилга байгууламжийн ажилд давхардсан тоогоор 349 удаа захиалагчийн техникийн хяналтыг хэрэгжүүлж, 18 сум 5 тосгонд 198 удаа томилолтоор ажиллажээ. Мөн 23 барилга байгууламжийн ерөнхий техникийн нөхцөл, 96 барилга байгууламжийн зураг төсөл, 59 загвар зурагт анхан шатны магадлал хийж, 119 барилга байгууламжийн их засварын ажлуудад ажил эхлэх, үргэлжлэх зөвшөөрөл олгосон байна. Хяналтыг сайжруулах зорилгоор нэг барилга байгууламжид багаараа хяналт тавих, мэргэжлийн байгууллуудтай хамтарсан шалгалт хийх гэх мэт ажлуудыг хийж гүйцэтгэжээ.
Уулзалтаар аймгийн Засаг дарга Ц.Чогсомжав дараах үүрэг чиглэлийг өгсөн юм. Тодруулбал:
1. Барилга байгууламжийг хүлээн авах Улсын комиссыг чанартай ажиллуулах,
2. Зарим бүтээн байгуулалтын ажлуудыг үүрэг даалгаврын биелэлтэйгээр хүлээж авдаг. Тиймээс үүрэг даалгаврын биелэлтэд эргэж хяналт тавих,
3. Барилга байгууламжийг шуурхай, чанартай ашиглалтад оруулахад санаачилгатай ажиллах
4. 5-9 дүгээр сард тухайн барилгуудыг үе шатны хуваарийнх нь дагуу ажлыг нь гүйцэтгүүлэх гэсэн чиглэл өглөө.
